سنچورین میں جاری پہلے ٹیسٹ کے تیسرے روز کا کھیل ختم ہوگیا، تیسرے روز پاکستان کے 148 رنز ہدف کے تعاقب میں جنوبی افریقہ نے پاکستان کے خلاف 3 وکٹ کے نقصان پر 27 رنز بنالیے ہیں اور اسے جیت کے لیے مزید 121 رنز درکار ہیں ۔
اس سے قبل پاکستان اور جنوبی افریقہ کے درمیان پہلے ٹیسٹ کے تیسرے روز کا کھیل بارش کے باعث تاخیر سے شروع ہوا۔ سنچورین میں بارش کے باعث پچ اور اسکور بورڈ کو کوورز سے ڈھانپ دیا گیا تھا۔ سنچورین میں گزشتہ رات تیز بارش ہوئی، آج بھی ہلکی بارش ہوتی رہی ۔
پاکستان اپنی دوسری اننگز میں 237 رنز بناکر آوٹ ہوئی، آج آؤٹ ہونے والے پہلے کھلاڑی بابر اعظم تھے جو 50 رنز بنا کر 153 کے مجموعی اسکور پر آؤٹ ہوئے۔بابر اعظم نے نصف سنچری81 گیندوں پر مکمل کی، ان کی اننگز میں 9 چوکے شامل تھے ۔
پاکستان کی دوسری اننگز میں سعود شکیل نے سب سے زیادہ 84 رنز سکور کیے، کپتان شان مسعود نے 28 رنز بنائے ۔عامر جمال 18رنز بنا کر آؤٹ ہوئے، سلمان آغا ایک رن بناسکے ۔
جنوبی افریقہ کی جانب سے مارکو جینسن نے 6 کھلاڑیوں کو آؤٹ کیا،ربادانے 2، بوش اور پیٹرسن نے ایک، ایک وکٹ حاصل کی ۔
پاکستان نے اپنی پہلی اننگ میں 211 رنز سکور کیے تھے جس کے جواب میں جنوبی افریقہ کی ٹیم 301 رنز بنا کر آؤٹ ہوگئی تھی اور اسے 90 رنز کی برتری ملی تھی ۔
148 رنز کے ہدف کے تعاقب میں میزبان جنوبی افریقہ کو بھی آج مشکلات کا سامنا کرنا پڑا اور صرف 27 رنز پر اس نے 3 وکٹ گنوادیں ۔
پاکستان کی جانب سے محمد عباس نے 2 اور خرم شہزاد نے ایک وکٹ حاصل کی ۔
جنوبی افریقہ کو سیریز کا پہلا ٹیسٹ جیتنے کے لیے چوتھے روز مزید 121 رنز کی ضرورت ہے جب کہ پاکستان کو 7 وکٹیں درکار ہیں ۔
