اسلام آباد :دفتر خارجہ سے جاری بیان میں کہا گیا ہے کہ افغانستان کے سفارتخانے کے ڈپٹی ہیڈ آف مشن کو وزارت خارجہ طلب کرکے بنوں چھاؤنی پر دہشت گردوں کے حملے پر سخت احتجاج کیا گیا۔
دفتر خارجہ کے مطابق عبوری افغان حکومت پر زور دیا گیا کہ وہ مکمل تحقیقات کرے اور بنوں حملے کے ذمہ داروں کے خلاف فوری اور مؤثر کارروائی کرے ۔
بیان کے مطابق افغان عبوری حکومت افغانستان کی سرزمین استعمال کرتے ہوئے پاکستان کے خلاف ایسے حملوں کی روک تھام کرے۔
پاکستان نے افغانستان کے اندر دہشتگرد تنظیموں کی موجودگی پر شدید تحفظات کا اعادہ کرتے ہوئے واضح کیا کہ افغان دہشتگرد پاکستان کی سلامتی کو مسلسل خطرہ بنا رہے ہیں، ایسے واقعات دونوں برادر ممالک کے باہمی تعلقات کی روح کے بھی خلاف ہیں۔
دفترخارجہ کا مزید کہناتھا کہ بنوں کینٹ حملہ علاقائی امن و سلامتی کے لیے دہشت گردی سے لاحق سنگین خطرے کی علامت ہے، پاکستان دہشتگردی کے خلاف فیصلہ کن کارروائی کے مطالبے کا اعادہ کرتا ہے، اس لعنت سے نمٹنے اور تمام خطرات کے خلاف اپنی سلامتی کو برقرار رکھنے کے اپنے عزم پر ثابت قدم ہے۔
