بنوں میں رات گئے پولیس کی بروقت اور مؤثر حکمتِ عملی کے باعث دہشت گردوں کا حملہ ناکام بنا دیا گیا، پولیس حکام کے مطابق جوابی کارروائی میں کئی دہشتگرد ہلاک جبکہ 5 شدید زخمی ہو گئے ، سرچ آپریشن کے دوران ایک لاش بھی برآمد ہوئی، مقابلے کے دوران بہادری کا مظاہرہ کرتے ہوئے کانسٹیبل فریداللہ معمولی زخمی ہوئے ۔
بنوں: پولیس حکام نے بتایا کہ بنوں میں رات تقریباً ڈیڑھ بجے دہشت گردوں کی بڑی تعداد نے چوکی مزنگہ پر حملہ کیا، جس پر سکیورٹی اہلکاروں نے فوری اور بھرپور جوابی کارروائی کی ۔
پولیس حکام نے مزید بتایا کہ فجر تک جاری رہنے والے مقابلے میں دہشتگرد پسپا ہوگئے ، پولیس کی جوابی کارروائی میں کئی دہشتگرد ہلاک جبکہ 5 شدید زخمی ہو گئے ۔
پولیس حکام کا کہنا ہے کہ علاقے مٰن سرچ آپریشن کے دوران ایک شخص کی لاش بھی برآمد ہوئی ہے ، اس حوالے سے مزید تفتیش جاری ہے ۔
واقعے کے بعد بنوں پولیس لائنز سے ڈی پی او بنوں یاسر آفریدی کی قیادت میں تازہ دم نفری موقع پر پہنچ گئی جبکہ دیگر سکیورٹی فورسز نے بھی علاقے کا کنٹرول سنبھال لیا ۔
مشترکہ سرچ آپریشن کے دوران علاقے سے خون کے کئی نشانات ملے جبکہ دہشت گردوں کا چھوڑا گیا اسلحہ اور سامان، جن میں بینڈولیئرز، سیڑھی اور جوتے شامل ہیں، برآمد کر لئے گئے ۔
مقابلے کے دوران بہادری کا مظاہرہ کرتے ہوئے کانسٹیبل فریداللہ معمولی زخمی ہوئے، جنہیں فوری طبی امداد فراہم کر دی گئی ہے ۔
آئی جی خیبرپختونخوا ذوالفقار حمید نے جوانوں کو خراج تحسین پیش کرتے ہوئے کہا کہ بزدل دہشتگرد عوام اور نہتے شہریوں کو نشانہ بنانے کے علاوہ کچھ نہیں کر سکتے، کالی بھیڑوں کا انجام عبرت ناک ہوگا ۔
ڈی پی او بنوں یاسر آفریدی نے کہا کہ بنوں پولیس دہشتگردی کے مکمل خاتمے کے لیے پرعزم ہے اور ہر قسم کی کارروائی کا بھرپور جواب دیا جا رہا ہے ۔
