(لوئر دیر ) لوئر دیر کے علاقے خرانہ سے گھر کے قریب سے لاپتہ ہونے والی پانچ سالہ بچی ماریہ کی لاش مل گئی۔
پولیس زرائع کے مطابق گزشتہ شام ماریہ ولدعبدالرحمٰن سکنہ خزانہ گھر سے باہر موجود تھی کہ اچانک لاپتہ ہوگئی۔ گھر والوں اور شہریوں نے لاپتہ بچی کی تلاش کی بھرپور کوشش کی۔ آج صبح گھر سے دور دریائے پنجکوڑہ کے کنارے بچی کی لاش مل گئی۔ اطلاع ملتے ہی پولیس کی بھاری نفری جائے وقوعہ پرپہنچ گئی جبکہ ورثاء نے لاش پوسٹ مارٹم کیلئے ڈسٹرکٹ ہیڈ کوارٹر ہسپتال تیمرگرہ منتقل کردی۔
ادھر ڈی پی او لوئر دیر ضیاء الدین نے دیگر پولیس افسران کے ہمراہ ڈسٹرکٹ ہیڈ کوارٹر ہسپتال تیمرگرہ اور جائے وقوعہ کا دورہ کیا اور اہم شواہد اکٹھے کئے۔ پولیس نے اندوہناک واقعہ کا سراغ لگانے کیلئے کئ ٹیمیں تشکیل دے دی ہیں۔ ڈسٹرکٹ ہیڈ کوارٹر ہسپتال تیمرگرہ کے ڈاکٹروں نے بچی سے جنسی زیادتی کا شبہ ظاہر کیا ہے۔ پولیس نے مقدمہ درج کر کے تفتیش شروع کردی۔ مقتولہ بچی کی نمازجنازہ اداکردی گئی جس میں پولیس افسران سمیت شہریوں نے کثیر تعداد میں شرکت کی۔ پانچ سالہ بچی کے قتل پر پورا علاقہ سوگ میں ڈوبا ہوا ہے اور عوام میں غم وغصہ اور تشویش کی لہر دوڑ گئی ہے۔
