ٹانک میں سیکیورٹی فورسز کی کارروائی میں کمانڈر سمیت 2 دہشت گرد ہلاک

ضلع ٹانک میں سیکیورٹی فورسز نے انٹیلی جنس بیسڈ کارروائی میں انتہائی مطلوب کمانڈر گل یوسف عرف طور سمیت 2 دہشت گرد ہلاک کر دئیے۔ پاک فوج کے شعبہ آئی ایس پی آر  کے مطابق سیکیورٹی فورسز نے ضلع ٹانک میں انٹیلی جنس بیسڈ آپریشن کیا، اس دوران شدید فائرنگ کے تبادلے میں 2 دہشت گرد مارے گئے۔

آئی ایس پی آر نے بتایا کہ گل یوسف عرف طور سیکیورٹی فورسز کےخلاف ٹانک اور ڈیرہ اسمٰعیل خان میں دہشت گردی کی مختلف کارروائیوں میں مطلوب تھا، دہشت گرد کمانڈر شہریوں کی ٹارگٹ کلنگ میں بھی ملوث رہا۔

یاد رہے دہشت گرد کمانڈر گل یوسف عرف طور انتہائی مطلوب اور اس کے سر کی قیمت 25 لاکھ روپے مقرر تھی۔