محکمہ موسمیات نے 18 جون سے ملک کے کچھ حصوں میں بارش کی پیش گوئی کی ہے۔
محکمہ موسمیات نے آئندہ 24 گھنٹوں کے دوران موسم گرم اور مرطوب رہنے کی پیشگوئی کرتے ہوئے کراچی کے بعض علاقوں میں مطلع جزوی طور پر ابر آلود رہنے کے ساتھ بوندا باندی کا امکان بھی ظاہر کیا ہے۔شہر میں زیادہ سے زیادہ درجہ حرارت 37 سیلسیس تک پہنچنے کا امکان ہے اور نمی کا تناسب 72 فیصد ریکارڈ کیا گیا ہے۔جنوب مغربی ہوائیں آج 10 سے 16 کلومیٹر کی رفتار سے چل رہی ہیں۔
ایک ہلکی مغربی لہر کا ملک کے مغربی حصوں تک پہنچنے کا امکان ہے۔ اس موسمی نظام کے زیر اثر گلگت بلتستان کشمیر اور خیبرپختونخوا میں 18 جون سے 22 جون تک وقفے وقفے سے گرج چمک کے ساتھ بارش کا امکان ہے۔ اس دوران کشمیر میں بھی ہلکی بارش کا امکان ظاہر کیا گیا ہے۔
اسلام آباد، راولپنڈی اور پنجاب کے مختلف اضلاع میں 18 جون سے 22 جون تک وقفے وقفے سے بارش کی بھی توقع ہے۔20 سے 22 جون تک بلوچستان کے کوئٹہ، ژوب، کوہلو، موسیٰ خیل، لورالائی، سبی، نصیر آباد، جعفرآباد، ڈیرہ بگٹی اور بارکھان میں گرد آلود ہواؤں اور گرج چمک کے ساتھ بارش کا امکان ہے۔21 اور 22 جون کو سندھ کے سکھر، جیکب آباد، کشمور اور لاڑکانہ اضلاع میں گرج چمک کے ساتھ گرد آلود ہوائیں چلنے کا امکان ہے۔
