افغانستان کے صوبہ بدخشان کے یفتل ضلع میں ایک بار پھر حالات کشیدہ ہو گئے، جہاں طالبان پولیس اور مظاہرین کے درمیان جھڑپوں کے دوران فائرنگ سے تین عام شہری جاں بحق ہو گئے ۔
مقامی ذرائع کے مطابق، علاقے کے لوگ طالبان پولیس کی مبینہ زیادتیوں کے خلاف احتجاج اور دھرنا دے رہے تھے ۔ مظاہرین کا الزام ہے کہ پولیس نے احتجاج منتشر کرنے کے لیے براہِ راست فائرنگ کی، جس کے نتیجے میں متعدد افراد زخمی ہوئے۔ مقامی اسپتال انتظامیہ نے بھی تین شہریوں کی ہلاکت کی تصدیق کی ہے ۔
مظاہرین کا کہنا ہے کہ ایک چیک پوسٹ پر طالبان اہلکاروں نے موٹر سائیکل پر سوار ایک خاتون کی تلاشی لی ، جسے مقامی روایات کے منافی قرار دیا جا رہا ہے ۔ احتجاج کرنے والوں نے واقعے میں ملوث اہلکار کے خلاف سخت کارروائی کا مطالبہ کیا ہے۔
دوسری جانب طالبان حکام کا مؤقف ہے کہ موٹر سائیکل پر سوار ایک مرد اور خاتون مبینہ طور پر منشیات اسمگل کرنے کی کوشش کر رہے تھے، جن کے خلاف کارروائی کی گئی ۔ حکام کے مطابق، اسی کارروائی کے بعد مقامی افراد نے احتجاج شروع کیا ۔
آزاد ذرائع سے ان متضاد دعوؤں کی تاحال تصدیق نہیں ہو سکی ۔
