لنڈی کوتل میں بلدیاتی نمائندہ گان، خیبر سیاسی اتحاد اور قومی مشران کی جانب سے طورخم سرحد پر افغانستان سے دنبوں کی پاکستان درآمد پر پابندی کے خلاف قومی جرگے کا انعقاد کیا گیا ہے۔
اس دوران قومی جرگہ کے شرکاء نے حکومت سے یہ مطالبہ کیا ہے کہ طورخم سرحد پر دنبوں کی درآمد پر پابندی کوبالکل ختم کیا جائے۔ان کے مطابق عید الاضحیٰ قریب ہے، اور دنبوں کی درآمد پر پابندی عائد کرنے سے ہزاروں افراد سنت ابراہیمی کی ادائیگی سے محروم رہ جاتے ہیں۔قومی جرگہ میں موجود دیگر شرکاء کا یہ کہنا تھا کہ طورخم سرحد پر گزشتہ پانچ سالوں سے قربانی کے جانوروں کی درآمد پر پابندی بلاجواز لگائی گئی ہے۔ ہم اس سلسلے میں آئین کے مطابق کسٹم ٹیکس ادا کرنے کے لئے تیار ہیں۔مزید جرگہ شرکاء نے بتایا ہے کہ طورخم سرحد پر دنبوں کی درآمد پر عائد پابندی کو فوری طور پر ختم کیا جانا چاہئے۔ساتھ ہی انہوں نے دھمکی دی ہے کہ اگر مطالبات کو نہ مانا گیا تو احتجاجی تحریک شروع کریں گئے۔
