خیبر پختونخوا میں طوفانی بارشوں کے دوران مختلف واقعات میں مزید 9 افراد جاں بحق، 50 سے زائد زخمی ہو گئے ،ڈیرہ اسمعیل خان میں گزشتہ رات شدید آندھی اور طوفانی بارش کے دوران حادثات و واقعات میں خواتین اور بچوں سمیت 8 افراد جاں بحق اور 40 زخمی ہوگئے ۔
پشاور: ریسکیو حکام خیبر پختونخوا کے مطابق ڈیرہ اسمٰعیل خان میں ہفتے اور اتوار کی درمیانی شب شدید آندھی اور طوفانی بارش ہوئی ۔
ڈی آئی خان کے مختلف علاقوں میں بارشوں کے دوران مختلف واقعات میں 8 افراد جاں بحق اور 40 سے زائد زخمی ہو گئے ۔
محکمہ موسمیات ڈیرہ اسمٰعیل خان کے مطابق طوفان کی رفتار 100 کلومیٹر فی گھنٹہ تک ریکارڈ کی گئی، شدید آندھی کے باعث درخت اکھڑ کر سڑکوں پر گرگئے جس کے باعث ٹریفک کی روانی متاثر ہوئی جبکہ گھروں اور عمارتوں کی چھتوں پر نصب سولر پینل بھی اڑ گئے ۔
پیسکو کے مطابق آندھی کے باعث بجلی کی ترسیل کا نظام درہم برہم ہوگیااور ٹانک، جنوبی وزیرستان، کلاچی اور ڈیرہ اسمٰعیل خان سمیت مختلف علاقوں میں بجلی کی فراہمی معطل ہوگئی ۔
ریسکیو حکام نے بتایا کہ ڈیرہ اسماعیل خان کے ڈسٹرکٹ ایمرجنسی آفیسر انجینئر فصیح اللہ کی ہدایت پر ریسکیو ٹیموں نے فوری ریسپانس دیتے ہوئے متاثرہ مقامات پر ریسکیو آپریشن شروع کیا، زخمیوں کو ابتدائی طبی امداد فراہم کرنے کے بعد قریبی ہسپتالوں میں منتقل کیا گیا جبکہ حادثاتی مقامات پر ملبہ ہٹانے کا کام بھی بروقت مکمل کیا گیا ۔
ادھر مردان میں بارش سے کمرے کی چھت گرنے سے ایک شخص جاں بحق اور 2 زخمی ہوگئے، لاش اور زخمیوں کو ٹی ایچ کیو اسپتال منتقل کر دیا گیا ۔
دریں اثنا، لکی مروت کے مختلف علاقوں میں طوفانی بارش سے پانی گھروں میں داخل ہوگیا، سرائے نورنگ کے علاقے میں پانی داخل ہونے سے 2 گھروں کی دیواریں گر گئیں جبکہ گھروں میں پھنسنے والے 10 افراد کو ریسکیو کرلیا گیا ۔
ریسکیو حکام کے مطابق طوفانی بارش کے دوران لکی مروت کےدیگر علاقوں میں بھی متعدد دیواریں گرنے کی اطلاعات موصول ہوئیں جبکہ کئی علاقوں میں سولر پینلز کو بھی نقصان پہنچا ۔
