وفاقی حکومت نے آئندہ مالی سال کے بجٹ میں ملک کے سب سے بڑے سوشل سیفٹی نیٹ بے نظیر انکم سپورٹ پروگرام کو وسعت دینے کا اعلان کر دیا ہے، یہ پروگرام اب خیبرپختونخوا کے نئے ضم شدہ اضلاع ،آزاد جموں و کشمیر اور گلگت بلتستان تک پھیلایا جائے گا ۔
بجٹ میں شامل نکات کے مطابق کفالت پروگرام کا دائرہ کار بھی نمایاں طور پر بڑھا دیا جائے گا، جس کے تحت اب ایک کروڑ خاندانوں کو مالی امداد فراہم کی جائے گی ۔
حکومت نے اس اقدام کے لیے گرانٹس کی مد میں 1928 ارب روپے مختص کیے ہیں، جو ملک کی سوشیو اکنامک بہتری کے لیے ایک اہم قدم قرار دیا جا رہا ہے ۔
حکام کے مطابق اس توسیع کا مقصد محروم علاقوں میں غربت میں کمی، خواتین کو بااختیار بنانا اور مالی تحفظ فراہم کرنا ہے ۔
خاص طور پر ضم شدہ اضلاع، گلگت بلتستان اور آزاد کشمیر میں بسنے والے کمزور طبقات کو اس پروگرام کے تحت پہلی مرتبہ مستقل مالی امداد فراہم کی جائے گی ۔
