پاکستان اور بھارت نے سرحدی کشیدگی میں کمی لانے اور ممکنہ جنگ کے خطرات کو کم کرنے کے لیے ایک اہم پیش رفت کرتے ہوئے اپنی افواج کو 30 مئی تک نارمل پوزیشن پر واپس بلانے کا فیصلہ کیا ہے۔ سکیورٹی ذرائع کے مطابق دونوں ممالک کی افواج انٹرنیشنل بارڈر اور لائن آف کنٹرول (ایل او سی) سے واپسی کا عمل شروع کر چکی ہیں۔
ذرائع کا کہنا ہے کہ یہ فیصلہ دونوں ممالک کے درمیان جاری تناؤ کو کم کرنے اور امن کے امکانات کو فروغ دینے کی ایک سنجیدہ کوشش ہے۔ اس عمل کے دوران ڈی جی ایم اوز (ڈائریکٹر جنرل ملٹری آپریشنز) کے درمیان مسلسل رابطہ اور بات چیت جاری ہے تاکہ سیز فائر پر مکمل عمل درآمد یقینی بنایا جا سکے۔
فوجی انخلا دو مراحل میں مکمل کیا جائے گا۔ پہلے مرحلے میں فضائیہ اور ایوی ایشن یونٹس کو ان کی معمول کی پوزیشنوں پر واپس بلایا جائے گا، جبکہ دوسرے مرحلے میں 30 مئی تک تمام زمینی فوجیں اپنی سابقہ پوزیشنوں پر واپس آ جائیں گی۔
ذرائع نے مزید بتایا کہ دونوں ممالک کے درمیان مستقبل قریب میں کسی نیوٹرل مقام پر براہ راست بات چیت کے آغاز کا امکان بھی ظاہر کیا جا رہا ہے، جو خطے میں دیرپا امن کی جانب ایک اہم قدم ثابت ہو سکتا ہے۔
