پاکستان تحریک انصاف کے رہنما اور ایم این اے شیر افضل مروت کے آبائی گاوں بیگوخیل میں ان کے حجرے کو نامعلوم افراد نے آگ لگا دی۔
ریسکیو ڈبل ون ڈبل ٹو کے مطابق آگ پر دو گھنٹوں میں قابو پالیا گیا ہے، آگ سے فرنیچر وغیرہ کو نقصان پہنچا ہے تاہم کوئی جانی نقصان نہیں ہوا۔
دوسری جانب رکن قومی اسمبلی شیر افضل مروت نے دعویٰ کیا ہے کہ ان کے حجرے کو نامعلوم شرپسندوں نے آگ لگا دی ہے۔
”ایکس“ پر اپنی پوسٹ میں شیر افضل مروت نے لکھا ہے کہ ’گزشتہ روز آدھی رات کو میرے آبائی گاؤں بیگو خیل میں نامعلوم شرپسندوں نے میرے حجرے کو آگ لگا دی۔‘
شیر افضل نے مزید کہا ہے کہ ‘اس میں کوئی شک نہیں کہ اس واقعے میں ان شرپسندوں کا ہاتھ تھا جنہوں نے اسلام آباد میں میرا گھر گرایا‘۔
شیر افضل مروت کے مطابق ایک وقت آئے گا جب ان شرپسندوں سے ان جرائم کا حساب لیا جائے گا۔
