اقوام متحدہ کے سیکرٹری جنرل انتونیو گوٹیریس اور دیگر ممالک نے پاک بھارت جنگ بندی کے اعلان کا خیر مقدم کیا ہے ۔
اقوام متحدہ کے سیکریٹری جنرل نے کہا کہ امید ہے پاک بھارت جنگ بندی پائیدار امن میں کردار ادا کرے گی، جنگ بندی سے دونوں ممالک میں دیرینہ مسائل کے حل کیلئے سازگار ماحول پیدا ہوگا ۔
اس سلسلے میں سعودی عرب کے وزیر مملکت برائے خارجہ امور عادل الجبیر نے نائب وزیراعظم و وزیر خارجہ اسحاق ڈار سے رابطہ کیا اور اسحاق ڈار نے جنوبی ایشیا میں امن و استحکام کے فروغ میں سعودی عرب کے مثبت و تعمیری کردار کو سراہا ۔
متحدہ عرب امارات کے وزیرخارجہ شیخ عبداللہ بن زاید نے بھی اپنے پاکستانی ہم منصب اسحاق ڈار سے ٹیلیفونک رابطہ کیا اور پاکستان اور بھارت میں کشیدگی کے خاتمے کی امید ظاہر کی ۔
دوسری جانب ایران کی وزارت خارجہ نے کہا کہ دونوں ممالک اس موقع کو کشیدگی میں کمی اور خطے کے پائیدار امن کے لیے استعمال کریں ۔
دوسری جانب جرمنی نے بھی اپنے خیالات کا اظہار کرتے ہوئے کہا کہ بات چیت ہی کشیدگی کے خاتمے کی کنجی ہے جبکہ برطانیہ نے بھی جنگ بندی کا خیر مقدم کیا ۔
