اسلام آباد: خیبر ٹی وی نیٹ ورک کے وائس چئرمین ائرمارشل (ریٹائرڈ) راجہ شاہد حامد انتقال کر گئے۔ ائر مارشل شاہد حامد خیبر نیٹ ورک کے چئیرمین بریگیڈئر (ریٹائرڈ) منصور حامد راجہ کے چھوٹے بھائی جبکہ چیف ایگزیکٹو آفیسر کامران حامد راجہ اور چیف آپریٹنگ آفیسر جواد حامد راجہ کے بڑے بھائی تھے۔
ائرمارشل (ریٹائرڈ) شاہد حامد راجہ نے چالیس برس تک پاکستان ائر فورس میں خدمات سرانجام دیں۔ ائر فورس میں رہتے ہوئے وہ تحقیقی شعبوں سے بھی وابستہ رہے۔ ائرمارشل شاہد حامد پاکستان ائر فورس میں شاندار کیرئیر کے حامل رہے ہیں۔ ائر فورس میں انہوں نے کئی کلیدی عہدوں پر کام کیا۔ وہ پاکستان ایروناٹیکل کمپلیکس کامرہ کے چئرمین رہے جبکہ وہ آلٹرنیو انرجی ڈیولپمنٹ بورڈ کے بھی سربراہ رہے جہاں ان کے کریڈٹ پر کئی شاندار کارنامے ہیں۔ پاکستان انجینئرنگ کونسل نے ائر مارشل(ریٹائرڈ) شاہد حامد راجہ کو لائف ٹائم اچیومنٹ میڈل سے نوازا۔ 2018 میں ورلڈ ونڈ انرجی کانفرنس میں ورلڈ ونڈ انرجی ایوارڈ سے بھی نوازا گیا۔
