اسلام آباد | 19 نومبر 2026
پاک رومانیہ ثقافتی اور سفارتی تعلقات کے فروغ اور دونوں ممالک کے درمیان دوستی مضبوط بنانے میں نمایاں خدمات کے اعتراف میں رومانیہ کی معروف سوپرانو گلوکارہ جارجیانا کوستیا گلوگا کو گلوبل ایمبیسیڈر ایوارڈ 2026 سے نواز دیا گیا۔
اسلام آباد کے ایک نجی ہوٹل میں منعقدہ آٹھویں گلوبل ایمبیسیڈر ایوارڈز کی تقریب میں انہیں پاکستان میں ثقافتی سفارت کاری کے فروغ اور دونوں ممالک کے درمیان ثقافتی روابط مستحکم بنانے پر یہ اعزاز دیا گیا۔
تقریب میں چیئرمین وزیراعظم یوتھ پروگرام رانا مشہود احمد خان، پاکستان میں رومانیہ کے سفیر ڈین سٹونیسکو سمیت سفارتی، سماجی اور دیگر اہم شخصیات نے شرکت کی۔
ایوارڈ کی جیوری کے مطابق جارجیانا کوستیا گلوگا نے اپنی تدریسی خدمات اور موسیقی کی پرفارمنسز کے ذریعے پاکستان اور رومانیہ کے ثقافتی تعلقات کو مضبوط بنانے میں اہم کردار ادا کیا ہے۔

وہ اپریل 2025 سے رومانیہ کے سفارت خانے اور پاکستان نیشنل کونسل آف دی آرٹس کے اشتراک سے اسلام آباد میں ہفتہ وار اوپیرا گائیکی کی کلاسز بھی منعقد کر رہی ہیں، جہاں نوجوان پاکستانی گلوکاروں کو کلاسیکی موسیقی کی تربیت فراہم کی جا رہی ہے۔
ان کلاسز کا مقصد پاکستان میں کلاسیکی موسیقی کو فروغ دینے کے ساتھ نوجوان فنکاروں کو عالمی معیار کی موسیقی سے روشناس کرانا اور دونوں ممالک کے درمیان ثقافتی تبادلوں کے مواقع پیدا کرنا ہے۔
گلوبل ایمبیسیڈر ایوارڈز کا آغاز 2014 میں کیا گیا تھا۔ ان ایوارڈز کا مقصد ثقافت، تعلیم اور عوامی روابط سمیت مختلف شعبوں میں پاکستان کی عالمی شراکت داری کے فروغ کے لیے نمایاں خدمات انجام دینے والی شخصیات کی حوصلہ افزائی اور اعتراف کرنا ہے۔

