آئی ایس پی آر نے کہا ہے کہ سیکیورٹی فورسز نے مہمند میں انٹیلی جنس بیسڈ مشترکہ آپریشن کیا۔
اس آپریشن کے دوران فتنہ الخوارج کے دہشتگرد قاری سمیت 3 دہشتگردوں کو ہلاک کردیا گیا۔
آئی ایس پی آر کے مطابق مہمند میں دہشت گردوں کے ٹھکانوں کو بھی تباہ کیا گیا۔
ہلاک دہشتگردوں کے قبضے سے اسلحہ، گولہ بارود اور دھماکہ خیز مواد کا ذخیرہ برآمد کر لیا گیا۔
آئی ایس پی آر نے بتایا کہ آپریشن کے دوران خیبر پختونخوا پولیس کا ایک اہلکار ابرار حسین شہید ہوگیا۔
آئی ایس پی آر کا مزید کہنا تھا کہ سیکیورٹی فورسز نے خفیہ اطلاعات پر ڈیرہ اسماعیل خان میں بھی کارروائی کی۔
اس کارروائی کے دوران سیکیورٹی فورسز نے دہشت گردوں کے ٹھکانے کو مؤثر طریقے سے نشانہ بنایا۔
اس آپریشن میں دہشتگرد صفت اللّٰہ عرف ملا منصور ہلاک جبکہ 3 دہشت گرد زخمی بھی ہوئے۔
دہشت گرد صفت اللّٰہ 12 دسمبر 2023 کو درابن میں خودکش بم حملے کی سہولت کاری میں ملوث تھا۔
آئی ایس پی آر کا کہنا تھا کہ دہشتگرد صفت اللّٰہ علاقے میں دہشت گردی کی متعدد کارروائیوں میں ملوث اور قانون نافذ کرنے والے اداروں کو انتہائی مطلوب تھا۔
آئی ایس پی آر نے یہ بھی بتایا کہ سیکیورٹی فورسز نے تیسری کارروائی شمالی وزیرستان میں کی، جہاں ایک دہشت گرد کو ہلاک کردیا گیا۔
آئی ایس پی آر کامزید کہنا تھا کہ سیکیورٹی فورسز امن و استحکام کےلیے قانون نافذ کرنے والے اداروں کے ساتھ کھڑی ہیں۔ بہادر جوانوں کی قربانیاں ہمارے عزم کو مزید مضبوط کرتی ہیں۔
آئی ایس پی آر کی جانب سے جاری بیان کے مطابق دہشتگردوں کے خلاف آپریشنز 28 اور 29 جولائی کو کیے گئے۔
