خیبر نیوز کے مقبول پروگرام کراس ٹاک میں سابق صوبائی وزیر اور تحریک انصاف کے رکن اسمبلی شکیل احمد خان نے دھماکہ خیز انکشافات کرتے ہوئے اپنی ہی جماعت کی حکومت پر شدید تنقید کی ہے۔ ان کا کہنا تھا کہ "کوہستان والا کرپشن 40 نہیں بلکہ 500 ارب روپے کا اسکینڈل ہے”۔
شکیل احمد خان نے گفتگو کے دوران کہا کہ وہ پہلے دن سے خبردار کرتے آ رہے ہیں کہ موجودہ حکومت کرپشن میں ریکارڈ قائم کرے گی۔ انہوں نے مزید کہا کہ "ایسی کرپٹ حکومت صوبے کی تاریخ میں پہلے کبھی نہیں دیکھی گئی۔”
انہوں نے الزام عائد کیا کہ خیبر پختونخوا میں اس وقت پی ٹی آئی کے نام پر کسی اور کی حکومت چل رہی ہے، اور عوام جنہوں نے خان کے نام پر ووٹ دیا، ان کے ساتھ دھوکہ ہوا ہے۔ "یہ لوگ عوامی مینڈیٹ کے ساتھ دھوکہ کر کے اپنی جیبیں بھرنے میں لگے ہوئے ہیں،” انہوں نے کہا۔
شکیل احمد خان کے ان بیانات نے سیاسی حلقوں میں ہلچل مچا دی ہے اور پی ٹی آئی کی اندرونی سیاست پر سوالات کھڑے کر دیے ہیں۔
