پنجاب کے شہر سیالکوٹ سے تعلق رکھنے والے دریائے سوات میں ڈوب کر جاں بحق ہونے والی ماں اور 2 بیٹیوں کی تدفین کر دی گئی، ایک ہی گھر سے 3 جنازے اٹھنے پر کہرام مچ گیا، علاقہ مکینوں نے بڑی تعداد میں نماز جنازہ میں شرکت کی ۔
گزشتہ روز دریائے سوات میں سلابی ریلے میں بہہ کر جاں بحق ہونے والی روبینہ زوجہ عبدالسلام، شرمین دختر عبدالسلام، تزمین دختر عبدالسلام کی نماز جنازہ دارالعلوم مدینہ ڈسکہ میں ادا کی گئی ۔
اہل خانہ اور علاقہ مکینوں کی بڑی تعداد نے نماز جنازہ میں شرکت کی، نماز جنازہ کی ادائیگی کے بعد تینوں ماں بیٹیوں کو سپرد خاک کردیا گیا ۔
قبل ازیں ایک ہی گھر میں 3 میتیں پہنچائی گئیں تو کہرام مچ گیا، لوگوں کی بڑی تعداد افسوس اور تعزیت کا اظہار کرنے متاثرہ خاندان کے پاس پہنچی، افسوس ناک واقعے پر ہر آنکھ اشک بار تھی ۔
تینوں ماں بیٹیوں کو سیکڑوں سوگواروں کی موجودگی میں آہوں اور سسکیوں کے ساتھ سپرد خاک کیا گیا ،جاں بحق ماں اور بیٹیاں سوات سیر کیلئے گئی تھیں ۔
