پشاور ہائیکورٹ نے خیبرپختونخوا میں 1730میٹرک ٹن گندم کی بوریاں غائب ہونے کے الزام میں گرفتار افسران کی درخواست ضمانت خارج کردی ۔
پشاور ہائی کورٹ میں گندم سکینڈل میں گرفتار سٹوریج آفیسر ارشد اور سابقہ ملازم طلا محمد کی ضمانت کی درخواستوں محفوظ فیصلہ سنا دیا گیا ، عدالت نے دونوں ملزمان کی ضمانت کی درخواستیں خارج کردیں ۔
ایڈیشنل ایڈووکیٹ جنرل محمد انعام یوسفزئی کے مطابق ملزم ارشد اضاخیل سٹوریج آفیسر ہے اور طلا محمد سابقہ ملازم ہے، دونوں ملزمان گندم سکینڈل میں ملوث ہیں، اضاخیل سٹوریج سے 1730 میٹرک ٹن (3300 گندم کی بوریاں) غائب کی گئیں ۔
انہوں نے بتایا کہ اینٹی کرپشن خیبرپختونخوا نے سکینڈل کی تحقیقات کرتے ہوئے ملزمان کے خلاف مقدمہ درج کیا اور ان کو حراست میں لیا، ملزمان کی ضمانت کی درخواستیں اینٹی کرپشن کورٹ نے بھی خارج کردی ہیں ۔
بعد ازاں پشاور ہائیکورٹ نے بھی محفوظ فیصلہ سناتے ہوئے دونوں ملزمان کی ضمانت کی درخواستیں خارج کردیں ۔
