پاکستان کرکٹ ٹیم نے بھارت کے خلاف ایشیا کپ میچ میں فخر زمان کے متنازع آؤٹ پر آئی سی سی سے ٹی وی امپائر کے فیصلے پر شکایت کردی ہے۔
گزشتہ روز ہونے والے پاک بھارت میچ میں فخر زمان کو ٹی وی امپائر کی جانب سے متنازع انداز میں آؤٹ قرار دیا گیا جس پر پاکستان کرکٹ ٹیم کے منیجر نوید اکرم چیمہ نے میچ کے بعد اپنے تحفظات میچ ریفری اینڈی پائی کرافٹ سے شیئر کیے۔
ذرائع کے مطابق، کپتان کی میچ رپورٹ میں بھی اس فیصلے کو ہائی لائٹ کیا گیا ہے اور پاکستانی ٹیم انتظامیہ نے آئی سی سی کے امپائرز اور منیجر کو باضابطہ شکایت درج کرائی ہے۔
اے سی سی ایشیا کپ کے اس اہم ترین میچ میں ٹی وی امپائر کے فرائض سری لنکا کے روچیرا پالیاگروگے نے انجام دیے۔ ان کا فیصلہ فخر زمان کو متنازع انداز میں کاٹ بی ہائینڈ قرار دینے کا تھا جس سے پاکستان کی پوزیشن پر اثر پڑا۔
اس فیصلے پر پاکستان کے کپتان سلمان علی آغا نے پریس کانفرنس میں کہا کہ "فخر زمان کا آؤٹ شاید غلط تھا، مگر امپائر ہی فیصلہ کرتے ہیں، ہمیں لگا کہ گیند زمین پر لگی، مگر فیصلہ امپائر کا ہی ہوتا ہے۔”
یاد رہے کہ فخر زمان 15 رنز پر آؤٹ ہوئے جبکہ اس وقت پاکستان کا اسکور 21 رنز تھا۔ فخر زمان اور ہیڈ کوچ نے اس فیصلے پر واپس جاکر ڈریسنگ روم میں ناراضی کا اظہار کیا تھا۔
