افغانستان کا 13 سالہ لڑکا کابل سے دہلی تک ایک مسافر طیارے کے لینڈنگ گیئر میں چھپ کر پہنچ گیا۔ بھارتی میڈیا کے مطابق یہ لڑکا کابل ایئرپورٹ کے سخت سیکیورٹی والے حصے سے افغان ایئرلائن کی پرواز کے لینڈنگ گیئر کمپارٹمنٹ میں داخل ہوا۔ دو گھنٹے کے سفر کے بعد پرواز دہلی ایئرپورٹ پہنچی، جہاں لینڈنگ کے بعد طیارے کے عملے نے لڑکے کو طیارے کے قریب دیکھا اور فوراً سیکیورٹی کو اطلاع دی۔
ابتدائی تفتیش کے مطابق یہ لڑکا افغانستان کے شمالی شہر قندوز کا رہائشی ہے اور اس نے یہ خطرناک قدم صرف تجسس کی بنا پر اٹھایا تھا۔ وہ اس بات سے بے خبر تھا کہ طیارے کے اس حصے میں آکسیجن کی کمی اور شدید سردی جان لیوا ثابت ہو سکتی ہے۔
بھارتی حکام کے مطابق لڑکے کو حراست میں لے کر سی آئی ایس ایف کے حوالے کیا گیا، اور بعد ازاں اُسے اسی ایئرلائن کی پرواز سے افغانستان واپس بھیج دیا گیا۔
سیکیورٹی خدشات کے پیش نظر ایئرلائن نے لینڈنگ گیئر کا مکمل معائنہ کیا، اس دوران ایک سرخ اسپیکر بھی برآمد ہوا جو غالباً لڑکے کا ذاتی سامان تھا۔ تاہم خوش قسمتی سے کوئی تخریبی مواد نہیں ملا اور جہاز کو محفوظ قرار دے دیا گیا۔
