چیئرمین تحریک انصاف بیرسٹر گوہر نے کہا ہے کہ حالات بدلنے کے لیے بانی سے ملاقات کی بھیک مانگتا ہوں، 2025 گزر گیا اب تو حالات بدلنے چاہئیں ،صاحب اقتدار لوگ کوئی طریقہ نکالیں تاکہ حالات بہتر ہوں ۔
راولپنڈی اڈیالہ روڈ داہگل ناکے پر میڈیا سے گفتگو کرتے ہوئے چیئرمین پی ٹی آئی نے کہا کہ تحریک اپنی جکہ لیکن مذاکرات بھی ہونے چاہئیں، حالات جیسے تقاضے کر رہے ہیں مذکرات ویسے نہیں ہو رہے ۔
بیرسٹر گوہر نے کہا کہ صاحب اقتدار سے درخواست کرتا ہوں کہ حالات کی نوعیت کو مدنظر رکھتے ہوئے دل بڑا کریں، اس ملک کے قوم کے بچوں پر رحم کریں ۔
چیئرمین پی ٹی آئی نے کہاکہ ہمارے لیے نظام ساکت ہوچکا ہے، ورنہ ہم یہاں روز کھڑے نہ ہوتے، ہم نئے سال میں داخل ہورہے ہیں، لگ رہا ہے 2026 بھی سزاؤں کا سال ہوگا ۔
بیرسٹر گوہر کا کہنا تھا کہ بانی پی ٹی آئی اور بشریٰ بی بی سمیت ہمارے 16 ارکان پارلیمنٹ کو سزا ہوئی، دشمن کے ساتھ سیز فائر ہوا ہمارا آپس کا تناؤ ختم نہیں ہورہا ۔
انہوں نے کہاکہ پی ٹی آئی نے کبھی مذاکرات کال آف نہیں کیے، میرے پاس بانی کی ایسی کوئی ہدایات نہیں آئی کہ آج کے بعد کوئی بات نہیں ہوگی، اسٹریٹ موومنٹ سے متعلق بانی نے ہدایات ضرور دی ہیں، اسٹریٹ موومنٹ ہوگی احتجاج ہمارا آئینی حق ہے ۔
