بنوں میں نامعلوم مسلح افراد نے ایک پولیس اہلکار کو اغوا کر لیا جبکہ ان کے گھر کو آگ بھی لگا دی گئی۔
پولیس کے مطابق یہ واقعہ تھانہ ٹاؤن شپ کے علاقے ڈوگر عمر زائی میں پیش آیا، جہاں مسلح افراد نے پولیس کانسٹیبل قدیر ولد نور زادہ کے گھر پر حملہ کیا۔ ملزمان اہلکار کو اغوا کرکے نامعلوم مقام پر منتقل کرنے کے بعد گھر کو نذرِ آتش کرکے فرار ہو گئے۔
اغوا ہونے والے کانسٹیبل قدیر سی پیک پولیس چوکی پر تعینات تھے۔ واقعے کے بعد علاقے میں خوف و ہراس پھیل گیا جبکہ پولیس اور قانون نافذ کرنے والے اداروں نے مغوی اہلکار کی بازیابی کے لیے سرچ آپریشن شروع کر دیا ہے۔
پولیس حکام کا کہنا ہے کہ واقعے کی مختلف پہلوؤں سے تحقیقات جاری ہیں اور ملزمان کی گرفتاری کے لیے چھاپے مارے جا رہے ہیں۔ مزید تفصیلات سامنے آنے پر میڈیا کو آگاہ کیا جائے گا۔
