بنوں کینٹ تھانے کی حدود، سوکڑی حسن خیل کے علاقے میں نامعلوم مسلح افراد نے تین بھائیوں کو اغوا کرنے کے بعد دو کو شہید کر دیا۔
تفصیلات کے مطابق گزشتہ رات 10 سے 15 مسلح افراد، جو مبینہ طور پر پولیس کی وردی میں ملبوس تھے، علاقے کی ایک مقامی مسجد میں داخل ہوئے اور وہاں موجود تین سگے بھائیوں کو اسلحہ کے زور پر اغوا کر کے ساتھ لے گئے۔ عینی شاہدین کے مطابق ملزمان منظم انداز میں کارروائی کرتے ہوئے فرار ہو گئے۔
بعد ازاں دو بھائیوں کی لاشیں بکاخیل مروت کینال روڈ کے قریب سے برآمد ہوئیں۔ اطلاع ملتے ہی پولیس موقع پر پہنچ گئی اور لاشوں کو تحویل میں لے کر ڈسٹرکٹ ہیڈکوارٹر ہسپتال منتقل کر دیا گیا۔ تیسرا بھائی تاحال لاپتہ بتایا جا رہا ہے۔
ذرائع کے مطابق اغوا کیے گئے تینوں بھائی سرکاری ملازمین تھے جبکہ شہید ہونے والے دو بھائی پولیس میں ڈیوٹی سرانجام دے رہے تھے۔ واقعے کے بعد پورے علاقے میں سوگ کی فضا ہے اور شہریوں میں شدید خوف و ہراس پایا جا رہا ہے۔
