امریکا نے افغان طالبان رجیم کے خلاف پاکستان کے حقِ دفاع کی حمایت کا اعلان کر دیا ہے۔ امریکی محکمہ خارجہ میں سیاسی امور کی سیکرٹری ایلیسن ہوکر نے سوشل میڈیا پر جاری بیان میں کہا کہ امریکا افغان طالبان کے حملوں کے خلاف پاکستان کے مؤقف کی حمایت کرتا ہے۔
انہوں نے بتایا کہ ان کی پاکستان کی سیکرٹری خارجہ آمنہ بلوچ سے ٹیلیفون پر بات چیت ہوئی جس میں پاک افغان سرحد پر حالیہ کشیدگی اور سیکیورٹی صورتحال پر تبادلہ خیال کیا گیا۔
ایلیسن ہوکر کے مطابق امریکا موجودہ صورت حال کو قریب سے مانیٹر کر رہا ہے اور پاکستان کو طالبان کی جانب سے ہونے والے حملوں کے خلاف اپنے دفاع کا مکمل حق حاصل ہے۔
اس سے قبل امریکی صدر ڈونلڈ ٹرمپ نے بھی پاک افغان کشیدگی پر ردعمل دیتے ہوئے کہا تھا کہ پاکستان افغانستان کے معاملے کو بہتر انداز میں سنبھال رہا ہے اور امریکا اس میں مداخلت نہیں کرے گا۔ امریکی صدر نے پاکستان کی قیادت کی تعریف کرتے ہوئے کہا کہ پاکستان کے پاس عظیم وزیراعظم اور جنرل موجود ہیں، اور وہ ان دونوں شخصیات کا بے حد احترام کرتے ہیں۔
