پاکستان نے اپنے میزائل پروگرام کے حوالے سے امریکی انٹیلیجنس ڈائریکٹر کی جانب سے جاری کردہ رپورٹ کو مسترد کر دیا ہے اور واضح کیا ہے کہ اس کے اسٹریٹجک صلاحیتیں مکمل طور پر دفاعی نوعیت کی ہیں۔
ترجمان دفتر خارجہ طاہر اندرابی کی جانب سے جاری بیان میں کہا گیا ہے کہ امریکی انٹیلیجنس ڈائریکٹر تلسی گیبرڈ کی رپورٹ، جس میں پاکستان کے میزائل پروگرام کو علاقائی اور امریکی سلامتی کے لیے خطرہ قرار دیا گیا، حقائق کے منافی ہے۔ بیان میں اس تاثر کو بے بنیاد قرار دیتے ہوئے مسترد کیا گیا ۔
دفتر خارجہ کے مطابق پاکستان کا میزائل پروگرام بین البراعظمی حدود سے کم ہے اور اس کا مقصد کسی بھی ملک کو نشانہ بنانا نہیں بلکہ اپنی سلامتی کو یقینی بنانا ہے ۔
دفتر خارجہ کے ترجمان کے بیان میں یہ بھی کہا گیا کہ خطے میں طاقت کے توازن کو برقرار رکھنے کے لیے پاکستان کی دفاعی صلاحیتیں ناگزیر ہیں ۔
ترجمان نے مزید وضاحت کی کہ بھارت کے پاس بارہ ہزار کلومیٹر سے زائد رینج کے میزائل موجود ہیں، جس کے تناظر میں پاکستان کا دفاعی نظام صرف اپنی خودمختاری اور علاقائی سلامتی کے تحفظ کے لیے ترتیب دیا گیا ہے، انہوں نے اس عزم کا اعادہ کیا کہ پاکستان اپنی قومی سلامتی پر کسی قسم کا سمجھوتہ نہیں کرے گا ۔
