پاکستان سپر لیگ (پی ایس ایل) کے 11ویں ایڈیشن کے دوسرے میچ میں کراچی کنگز نے کوئٹہ گلیڈی ایٹرز کو 14 رنز سے شکست دے دی۔
لاہور کے قذافی اسٹیڈیم میں کھیلے گئے میچ میں کوئٹہ گلیڈی ایٹرز نے ٹاس جیت کر پہلے فیلڈنگ کا فیصلہ کیا۔ کراچی کنگز نے پہلے بیٹنگ کرتے ہوئے مقررہ 20 اوورز میں 7 وکٹوں کے نقصان پر 181 رنز اسکور کیے۔
کراچی کنگز کی جانب سے انگلش آل راؤنڈر معین علی نے شاندار بیٹنگ کرتے ہوئے 29 گیندوں پر 48 رنز ناٹ آؤٹ بنائے، جس میں چار چوکے اور تین چھکے شامل تھے۔ کپتان ڈیوڈ وارنر نے 35 رنز جبکہ مرزا سعد بیگ نے 30 رنز کی اننگز کھیلی۔
کوئٹہ گلیڈی ایٹرز کی جانب سے احمد دانیال نے تین جبکہ الزاری جوزف نے دو وکٹیں حاصل کیں۔
ہدف کے تعاقب میں کوئٹہ گلیڈی ایٹرز کے اوپنرز سعود شکیل اور شامل حسین نے 79 رنز کا عمدہ آغاز فراہم کیا۔ شامل حسین نے جارحانہ انداز اپناتے ہوئے 24 گیندوں پر 52 رنز اسکور کیے جبکہ سعود شکیل نے 33 رنز بنائے۔
تاہم بعد کے بلے باز کراچی کنگز کے بولرز کا مقابلہ نہ کر سکے۔ خاص طور پر حسن علی کی شاندار بولنگ کے سامنے کوئٹہ کی ٹیم مقررہ 20 اوورز میں 7 وکٹوں کے نقصان پر 167 رنز تک محدود رہی۔ حسن علی نے 27 رنز کے عوض 4 وکٹیں حاصل کیں اور اپنی ٹیم کی فتح میں اہم کردار ادا کیا۔
رائلی روسو اور بین میکڈرموٹ نے بھی 25،25 رنز بنائے، تاہم ٹیم کو شکست سے نہ بچا سکے۔
