پشاور (خصوصی رپورٹر) — ریڈیو اور ٹیلی ویژن کی معروف سینئر فنکارہ نوشابہ نے کہا ہے کہ خیبر ٹیلی ویژن نیٹ ورک نے ہمیشہ ان کی فنی خدمات کو قدر کی نگاہ سے دیکھا اور انہیں مسلسل اپنے پروگراموں کا حصہ بنایا۔
گزشتہ روز "خیبر سحر” پروگرام میں شرکت کے بعد اخبار خیبر سے گفتگو کرتے ہوئے انہوں نے بتایا کہ خیبر ٹیلی ویژن نے گزشتہ 21 سالوں کے دوران جبکہ کے ٹو چینل نے 16 سال تک انہیں مختلف پروگراموں، خصوصاً اردو اور پشتو ڈراموں میں کام کرنے کے مواقع فراہم کیے۔
نوشابہ کا کہنا تھا کہ جب بھی انہیں مدعو کیا گیا، ہمیشہ عزت اور احترام کے ساتھ خوش آمدید کہا گیا۔ انہوں نے مزید کہا کہ پی ٹی وی کے کئی فنکار بھی آج کل خیبر ٹیلی ویژن اور کے ٹو پر وقتاً فوقتاً اپنی صلاحیتوں کا مظاہرہ کرتے نظر آتے ہیں۔
انہوں نے خیبر ٹیلی ویژن کے حوالے سے اپنے جذبات کا اظہار کرتے ہوئے کہا کہ یہ ان کا دوسرا گھر ہے، جہاں آ کر انہیں ہمیشہ خوشی اور اپنائیت کا احساس ہوتا ہے۔
