پشاور (شوبز رپورٹر): معروف ڈرامہ نگار، پروڈیوسر اور ڈائریکٹر رشید احمد سہیل پراچہ نے کہا ہے کہ خیبر ٹیلی ویژن نے تفریحی مواد کے ساتھ ساتھ پختونوں کی روایات، تہذیب اور عظمت رفتہ کو ہمیشہ اپنی اولین ترجیحات میں شامل رکھا ہے۔
اخبار خیبر کو دیے گئے انٹرویو میں انہوں نے بتایا کہ وہ 2004 کے ابتدائی پروڈیوسرز میں شامل رہے ہیں اور اس دوران لاتعداد ڈرامہ سیریلز، اسپیشل لانگ پلے، میوزک شوز، ٹاک شوز، کوکنگ پروگرامز اور بچوں کے پروگرامز خیبر ٹیلی ویژن کی اسکرین کی زینت بنے۔
رشید سہیل پراچہ کے مطابق گزشتہ دو دہائیوں سے زائد عرصے میں چینل کے ہر پروگرام میں پختون ثقافت، روایات اور اخلاقی اقدار کو خصوصی اہمیت دی گئی، جس کی وجہ سے خیبر ٹیلی ویژن کو ایک فیملی چینل کے طور پر تسلیم کیا جاتا ہے۔
انہوں نے کہا کہ فنکاروں کے جائز حقوق کے تحفظ کے لیے وہ ہمیشہ آواز بلند کرتے رہے ہیں اور اس پر انہیں فخر ہے کہ انہوں نے انڈسٹری میں اس حوالے سے مثبت کردار ادا کیا۔
