پشاور (حسن علی شاہ) — امریکہ اور دیگر عالمی رہنماؤں نے پاکستان کی کامیاب سفارتکاری اور خطے میں امن کے لیے اس کے کردار کا اعتراف کیا ہے۔
امریکی صدر ڈونلڈ ٹرمپ اور نائب صدر جے ڈی وینس نے امریکہ اور ایران کے درمیان جاری مذاکرات میں پیش رفت کو تسلیم کرتے ہوئے پاکستان کے کردار کو اہم قرار دیا۔ امریکی قیادت کے مطابق فیلڈ مارشل سید عاصم منیر ایک باصلاحیت اور دوراندیش شخصیت ہیں جنہوں نے خطے میں امن کے لیے مؤثر کردار ادا کیا ہے۔
ذرائع کے مطابق امریکہ اور ایران کے درمیان مذاکرات کے اگلے دور کی میزبانی ممکنہ طور پر اسلام آباد میں کی جائے گی۔ امریکی صدر ٹرمپ نے کہا کہ ایران کے ساتھ جوہری معاملات “ریڈ لائن” ہیں اور توقع ہے کہ تہران آبنائے ہرمز کی بندش کے حوالے سے عملی اقدامات کرے گا۔
صدر ٹرمپ نے مزید کہا کہ پاکستان نے موجودہ کشیدہ صورتحال میں بطور ثالث اہم اور مثبت کردار ادا کیا ہے، اور مذاکرات کے لیے اسلام آباد کو ایک مناسب اور غیر جانبدار مقام قرار دیا جا رہا ہے۔
دوسری جانب ایران، سعودی عرب، کویت، فرانس، رومانیہ، برطانیہ، روس، ترکی، مصر، عمان اور قطر سمیت متعدد ممالک نے بھی پاکستان کی سفارتی کوششوں کو سراہتے ہوئے اس پر اعتماد کا اظہار کیا ہے۔
ان ممالک نے فیلڈ مارشل سید عاصم منیر، وزیر اعظم شہباز شریف اور وزیر خارجہ و نائب وزیر اعظم اسحاق ڈار کی کوششوں کو خطے میں امن و استحکام کے لیے قابلِ تحسین قرار دیا۔
مبصرین کے مطابق پاکستان کا نام اس وقت عالمی سطح پر ایک امن پسند، ذمہ دار ایٹمی ریاست اور مؤثر ثالث کے طور پر ابھر رہا ہے۔
