پشاور (شوبز ڈیسک) — خیبر ٹیلی ویژن پشاور اسٹیشن کا مقبول میوزیکل کامیڈی پروگرام “شینو مینو شو” اپنی کامیابیوں اور مقبولیت کے سفر میں بدستور آگے بڑھ رہا ہے اور ناظرین میں اس کی مقبولیت روز بروز بڑھ رہی ہے۔
یہ اپنی نوعیت کا واحد پروگرام ہے جس میں صوبے کے مختلف علاقوں سے تعلق رکھنے والے نامور گلوکار، موسیقار اور گیت نگار شرکت کرتے ہیں اور اپنی صلاحیتوں کا مظاہرہ کرتے ہیں۔ پروگرام کی ٹیم میں مینہ شمس، شینو ماما اور عالمی شہرت یافتہ رباب نواز شاہد ملنگ شامل ہیں جو اس شو کا اہم حصہ ہیں۔ یہ پروگرام طویل المدتی کامیاب شوز میں بھی شمار کیا جاتا ہے۔
“شینو مینو شو” میں ملک کے ممتاز فنکاروں نے بھی اپنی آواز اور فن کا مظاہرہ کیا ہے جن میں استاد خیال محمد، استاد نذیر گل، استاد احمد گل، شوکت محمود، خالد ملک، بہادر زیب، استاد ظفر فاروق، ماسٹر رحیم گل، حشمت سحر، عشرت سحر، مینہ گل، گلزار عالم اور بختیار خٹک شامل ہیں۔
اس کے علاوہ ماسٹر علی حیدر، فیاض خویشکی، عرفان کمال اور وصال خیال بھی متعدد بار اپنی سحر انگیز آوازوں سے ناظرین کو محظوظ کر چکے ہیں۔ پروگرام اپنی منفرد پیشکش اور علاقائی ثقافت کے فروغ کی وجہ سے نمایاں مقام رکھتا ہے۔
