وفاقی وزیر خزانہ محمد اورنگزیب نے کہا ہے کہ پاکستان کی معیشت بہتری کی جانب گامزن ہے اور ملک معاشی شعبے میں ادارہ جاتی اصلاحات پر عمل پیرا ہے۔
انہوں نے یہ بات اسلام آباد میں پاکستان یورپی یونین بزنس فورم سے خطاب کرتے ہوئے کہی۔ وزیر خزانہ نے کہا کہ مارچ میں کرنٹ اکاؤنٹ ایک ارب ڈالر سے زائد سرپلس رہا، جب کہ رواں مالی سال کے پہلے نو ماہ میں بھی کرنٹ اکاؤنٹ سرپلس برقرار ہے۔
ان کا کہنا تھا کہ جون تک زرمبادلہ کے ذخائر 18 ارب ڈالر تک پہنچنے کی توقع ہے جب کہ جی ڈی پی کی شرح نمو 4 فیصد رہنے کی امید ہے۔ انہوں نے کہا کہ روشن ڈیجیٹل اکاؤنٹ ایک بہترین نظام ہے۔ وزیر خزانہ محمد اورنگزیب نے مزید کہا کہ یورو بانڈ کی بروقت ادائیگی یقینی بنائی گئی ہے، قرض ادائیگی میں کمی سے حکومت کو مالی گنجائش حاصل ہو گی۔ اس اضافی گنجائش کو آئندہ بجٹ میں دیگر شعبوں کے لیے استعمال کیا جائے گا۔
سعودی اضافی مالی معاونت اور ڈپازٹس میں توسیع سے مالی پوزیشن مستحکم ہوگی، محمد اورنگزیب
