پشاور (حسن علی شاہ): خیبرپختونخوا میں سرکاری ایف ایم ریڈیوز کے ملازمین اور اینکرز کو گزشتہ آٹھ ماہ سے تنخواہوں اور معاوضوں کی ادائیگی نہ ہونے کا انکشاف ہوا ہے، جس کے باعث ملازمین شدید مالی مشکلات سے دوچار ہیں۔
ذرائع کے مطابق تین ماہ قبل ڈائریکٹر جنرل انفارمیشن خیبرپختونخوا محمد عمران کی ریٹائرمنٹ کے بعد تاحال اس اہم عہدے پر کسی نئی تعیناتی عمل میں نہیں لائی گئی، جس کے باعث محکمہ اطلاعات کے تمام دفتری اور انتظامی امور بری طرح متاثر ہوئے ہیں۔
بتایا گیا ہے کہ صوبہ بھر کے ایف ایم ریڈیو چینلز میں کام کرنے والے ملازمین اور آر جیز (RJ’s) کو گزشتہ 8 ماہ سے تنخواہیں اور معاوضے ادا نہیں کیے گئے۔
مزید یہ بھی سامنے آیا ہے کہ متعلقہ حکام کو ان مسائل سے تحریری طور پر آگاہ کیا گیا، تاہم تاحال اس حوالے سے کوئی عملی اقدامات نہیں اٹھائے گئے، جس سے صورتحال مزید سنگین ہوتی جا رہی ہے۔
ملازمین نے مطالبہ کیا ہے کہ فوری طور پر تنخواہوں کی ادائیگی کو یقینی بنایا جائے اور محکمہ اطلاعات میں انتظامی خلا کو پر کرنے کے لیے فوری تعیناتی کی جائے۔
