گلگت بلتستان کے ضلع گانچھے کی وادی ہُشے میں واقع کے-6 چوٹی پر برفانی تودہ گرنے کے نتیجے میں ایک فرانسیسی کوہ پیما جاں بحق ہوگیا، جبکہ بین الاقوامی ٹیم کے دو دیگر ارکان تاحال بیس کیمپ واپس نہیں پہنچ سکے۔
الپائن کلب آف پاکستان کے مطابق جاں بحق ہونے والا کوہ پیما تین رکنی بین الاقوامی مہم کا حصہ تھا جو کے-6 چوٹی سر کرنے کی کوشش کر رہی تھی۔ دورانِ مہم برفانی تودہ گرنے سے یہ افسوسناک حادثہ پیش آیا۔
الپائن کلب کا کہنا ہے کہ ٹیم کے دیگر دو ارکان کے بارے میں فوری طور پر معلومات دستیاب نہیں ہو سکیں اور وہ تاحال بیس کیمپ واپس نہیں پہنچے ہیں، جس کے باعث ان کی تلاش کے لیے ریسکیو سرگرمیاں تیز کر دی گئی ہیں۔
واقعے کے بعد پولیس اور مقامی رضاکاروں پر مشتمل ریسکیو ٹیم کو متاثرہ علاقے کی جانب روانہ کر دیا گیا ہے، جو لاپتہ کوہ پیماؤں کی تلاش اور صورتحال کا جائزہ لینے میں مصروف ہے۔
حکام کے مطابق دشوار گزار پہاڑی علاقے اور موسمی حالات کے باعث ریسکیو کارروائیوں میں مشکلات کا سامنا ہے، تاہم لاپتہ افراد کی تلاش کے لیے تمام دستیاب وسائل بروئے کار لائے جا رہے ہیں۔
