خیبرپختونخوا کے انسپکٹر جنرل (آئی جی) پولیس ذوالفقار حمید نے مختلف اضلاع اور پولیس یونٹس میں 76 جدید سرویلنس ڈرونز تقسیم کر دیے ہیں، جن کا بنیادی مقصد دہشت گردوں کے خلاف مؤثر کارروائیوں اور انٹیلی جنس بیسڈ آپریشنز کی صلاحیت کو مزید بہتر بنانا ہے۔
آئی جی پولیس ذوالفقار حمید کا کہنا تھا کہ خیبرپختونخوا پولیس کو جدید اسلحہ اور ٹیکنالوجی سے لیس کیا جا رہا ہے تاکہ دہشت گردی کے خلاف مؤثر انداز میں کارروائیاں کی جا سکیں۔ انہوں نے کہا کہ پولیس کو فراہم کیے گئے ڈرونز فضائی نگرانی، ٹارگٹڈ آپریشنز اور انٹیلی جنس بیسڈ کارروائیوں میں اہم کردار ادا کریں گے۔
انہوں نے مزید بتایا کہ پولیس کو تھرمل ٹیکنالوجی سے لیس جدید آلات بھی فراہم کیے گئے ہیں، جبکہ ایسے خصوصی ڈرونز بھی خریدے گئے ہیں جو اضافی وزن اٹھانے کی صلاحیت رکھتے ہیں۔ آئی جی پولیس کے مطابق خیبرپختونخوا پولیس دہشت گردی کے خلاف صفِ اول کی فورس ہے، اس لیے اسے جدید وسائل اور ٹیکنالوجی سے مسلسل مضبوط بنایا جا رہا ہے۔
