فیفا فٹبال ورلڈ کپ کے ناک آؤٹ مرحلے کے سنسنی خیز مقابلے جاری ہیں، جہاں سوئٹزرلینڈ اور ارجنٹینا نے اپنے اپنے میچ جیت کر کوارٹر فائنل کے لیے کوالیفائی کر لیا۔
امریکا کے شہر اٹلانٹا میں کھیلے گئے راؤنڈ آف 16 کے اہم میچ میں ارجنٹینا نے مصر کو 2 کے مقابلے میں 3 گول سے شکست دی۔ مصر نے پہلے ہاف کے اختتام تک دو صفر کی برتری حاصل کر رکھی تھی، تاہم ارجنٹینا نے میچ کے 80ویں منٹ میں پہلا گول کیا اور اس کے بعد مزید دو گول کر کے کامیابی اپنے نام کر لی۔
میچ کے دوران ریفری کے بعض فیصلے متنازع رہے۔ مصر کا ایک گول فاؤل قرار دیا گیا جبکہ دیگر فیصلوں پر بھی اعتراضات سامنے آئے۔
دوسری جانب کینیڈا کے شہر وینکوور میں کھیلے گئے ایک اور پری کوارٹر فائنل میں سوئٹزرلینڈ نے دلچسپ مقابلے کے بعد کولمبیا کو پنالٹی شوٹ آؤٹ میں شکست دے دی۔ مقررہ وقت تک دونوں ٹیمیں کوئی گول نہ کر سکیں، جس کے بعد پنالٹی شوٹ آؤٹ میں سوئٹزرلینڈ نے 4 کے مقابلے میں 3 گول سے کامیابی حاصل کی۔
فیفا ورلڈ کپ کے کوارٹر فائنل مرحلے کا آغاز 10 جولائی سے ہوگا، جہاں پہلے کوارٹر فائنل میں فرانس اور مراکش کی ٹیمیں بوسٹن میں مدمقابل ہوں گی۔ دوسرا کوارٹر فائنل 11 جولائی کو لاس اینجلس میں اسپین اور بیلجیئم کے درمیان کھیلا جائے گا، جبکہ اتوار کو میامی میں ناروے اور انگلینڈ آمنے سامنے ہوں گے۔ اسی روز کنساس میں کھیلے جانے والے چوتھے اور آخری کوارٹر فائنل میں سوئٹزرلینڈ کا مقابلہ دفاعی چیمپئن ارجنٹینا سے ہوگا۔
