اسلام آباد: وزیراعظم محمد شہباز شریف نے یومِ شہدائے پولیس کے موقع پر پولیس کے جانباز افسران اور اہلکاروں کو دلی خراجِ عقیدت پیش کیا ہے جنہوں نے وطنِ عزیز کے لیے اپنی جانوں کا نذرانہ پیش کیا۔
اپنے پیغام میں وزیراعظم نے کہا کہ ملک میں دہشت گردی، انتہا پسندی اور جرائم کے خلاف جنگ میں پولیس نے ہمیشہ ہراول دستے کا کردار ادا کیا اور غیر متزلزل عزم کا مظاہرہ کیا جو قابلِ تحسین ہے۔
انہوں نے کہا کہ پولیس شہدا کی ناقابلِ فراموش قربانیوں نے شہریوں کے جان و مال کے تحفظ، قانون کی بالادستی اور امن و امان کے قیام میں کلیدی کردار ادا کیا ہے۔
وزیراعظم نے کہا کہ پوری قوم اپنے غیور بیٹوں اور بیٹیوں کو سلام پیش کرتی ہے جن کی بے لوث خدمات نے آنے والی نسلوں کے لیے محفوظ اور روشن مستقبل کی راہ ہموار کی۔
انہوں نے کہا کہ یومِ شہدائے پولیس پر شہدا کے اہلِ خانہ کے صبر، استقامت اور حوصلے کو بھی خصوصی سلام پیش کرتے ہیں، ان کی قربانیاں پوری قوم کی مشترکہ قربانیاں ہیں۔
محمد شہباز شریف نے کہا کہ شہدا کے خاندانوں کی فلاح و بہبود اور ہر ممکن معاونت کو یقینی بنانا حکومت کی اولین ذمہ داری ہے۔
حکومت شہدا کے اہلِ خانہ کو معیاری تعلیم، صحت کی بہترین سہولیات اور دیگر فلاحی اقدامات سمیت ہر ممکن تعاون فراہم کرنے کے لیے پُرعزم ہے۔
وزیراعظم نے کہا کہ پولیس کو اپنی قومی ذمہ داریوں کی ادائیگی کے لیے ہر ممکن سہولیات فراہم کی جائیں گی اور پولیس اہلکاروں کی پیشہ ورانہ استعداد مزید مضبوط بنانے کے لیے انہیں جدید وسائل سے آراستہ کیا جائے گا۔
