محکمہ موسمیات نے آئندہ 24 گھنٹوں کے دوران ملک کے بیشتر علاقوں میں موسم گرم اور مرطوب رہنے کی پیشگوئی کرتے ہوئے کہا ہے کہ خیبرپختونخوا، بالائی پنجاب، گلگت بلتستان اور کشمیر کے چند مقامات پر تیز ہواؤں اور گرج چمک کے ساتھ بارش کا امکان ہے۔
محکمہ موسمیات کے مطابق خیبرپختونخوا کے بیشتر اضلاع میں شدید گرمی برقرار رہے گی، تاہم ہزارہ، ملاکنڈ اور دیگر چند علاقوں میں ہلکی بارش متوقع ہے۔
رپورٹ کے مطابق خیبرپختونخوا میں بنوں سب سے زیادہ گرم شہر رہا جہاں درجہ حرارت 41 ڈگری سینٹی گریڈ ریکارڈ کیا گیا، جبکہ پشاور میں 35 اور مالم جبہ میں 23 ڈگری سینٹی گریڈ درجہ حرارت ریکارڈ ہوا۔
بلوچستان میں تربت 45 ڈگری سینٹی گریڈ کے ساتھ ملک کا گرم ترین شہر رہا، جبکہ سبی میں 44 اور کوئٹہ میں 36 ڈگری سینٹی گریڈ درجہ حرارت ریکارڈ کیا گیا۔
صوبہ سندھ کے شہر دادو میں 43 ڈگری سینٹی گریڈ جبکہ کراچی میں 33 ڈگری سینٹی گریڈ درجہ حرارت ریکارڈ کیا گیا۔
پنجاب میں ڈیرہ غازی خان اور ساہیوال میں 39، لاہور میں 36 جبکہ مری میں 25 ڈگری سینٹی گریڈ درجہ حرارت ریکارڈ کیا گیا۔
