وفاقی وزیر اطلاعات عطا تارڑ نے بانی پی ٹی آئی عمران خان کے پمز ہسپتال میں طبی معائنے اور واپس اڈیالہ جیل منتقل کرنے کی تصدیق کردی ۔
اسلام آباد: سوشل میڈیا پر اپنے بیان میں وفاقی وزیر عطا تارڑ نے کہا کہ قیدی کو 20 اور 21 اگست کی درمیانی شب حفاظتی انتظامات کے تحت پمز ہسپتال لے جایا گیا جہاں شفا انٹرنیشنل ہسپتال کے ماہرِ امراض چشم، ماہرِ امراض قلب اور فزیشن سمیت مستند ڈاکٹروں نےان کامعائنہ کیا ۔
انہوں نے کہا کہ پی ٹی آئی کے کارکنوں کی طرف سے جو سکیورٹی کی صورتحال شفا ہسپتال کے راستے میں اور باہر پیدا کی گئی اس کے پیش نظر ان کو پمز ہسپتال لے جایا گیا جہاں شفا ہسپتال کے ڈاکٹرز اور قیدی کی بہن عظمیٰ خان بھی موجود تھے ۔
وزیر اطلاعات کے مطابق ڈاکٹروں نے عمران خان کو طبی طور پرصحت مند قراردیا جب کہ ان کی ہمشیرہ عظمیٰ خان علاج کےتمام مراحل کےدوران موجود رہیں ۔
عطا تارڑ نے کہا کہ طبی معائنےکے بعد انہیں 21 اگست کی صبح 5 بجے واپس اڈیالہ جیل منتقل کیاگیا، عمران خان کو پہلے بھی طبی سہولیات فراہم کی جاتی رہی ہیں اور اب بھی جب ان کو ضرورت پڑے گی طبی سہولیات فراہم کی جائیں گی ۔
واضح رہے کہ سپریم کورٹ نے بدھ کے روز دیے گئے فیصلے میں عمران خان کو شفا ہسپتال منتقل کرنے کا حکم دیا تھا، عدالتی فیصلے کے خلاف وفاقی حکومت نے نظر ثانی کی اپیل بھی دائر کی تھی ۔
