کوئٹہ، 10 ستمبر 2026: وزیراعلیٰ بلوچستان میر سرفراز بگٹی نے واضح کیا ہے کہ صوبے میں سرکاری ملازمتوں کی خرید و فروخت کسی صورت برداشت نہیں کی جائے گی اور جہاں نوکریاں فروخت ہونے کے مصدقہ ثبوت ملے، وہاں متعلقہ وزیر اور سیکریٹری کو عہدے پر نہیں رہنے دیا جائے گا۔
وزیراعلیٰ بلوچستان کی زیر صدارت سیکریٹریز کمیٹی کا اجلاس ہوا، جس میں مختلف محکموں کی کارکردگی کا جائزہ لیا گیا۔ اجلاس کے دوران سرکاری بھرتیوں میں شفافیت، میرٹ اور بے ضابطگیوں کے تدارک پر خصوصی توجہ دی گئی۔
میر سرفراز بگٹی نے کہا کہ انہوں نے پہلے دن ہی واضح کردیا تھا کہ بلوچستان میں کوئی نوکری فروخت نہیں ہوگی۔ ان کے مطابق اس اصولی مؤقف پر کابینہ کے اراکین، چیف سیکریٹری بلوچستان اور حکومت ایک پیج پر ہیں۔
وزیراعلیٰ نے محکمہ جنگلات میں بھرتیوں کے حوالے سے بے ضابطگیوں کی شکایات کا نوٹس لیتے ہوئے اعلیٰ سطحی تحقیقات کا حکم بھی دیا۔ انہوں نے کہا کہ اگر غیر جانبدارانہ تحقیقات کے دوران مصدقہ شواہد کی بنیاد پر کسی فرد کا جرم ثابت ہوا تو ملوث عناصر سزا سے نہیں بچ سکیں گے۔
انہوں نے افسران کو خبردار کیا کہ جس بھی محکمے میں نوکریوں کی خرید و فروخت کے مصدقہ ثبوت سامنے آئے، وہاں متعلقہ وزیر اور سیکریٹری کے خلاف کارروائی ہوگی۔
میر سرفراز بگٹی نے کہا کہ بلوچستان کے نوجوان سردی میں ٹھٹھرتے اور گرمی میں جھلستے ہوئے روزگار کے مواقع کے منتظر رہتے ہیں، ان کی نوکری فروخت ہونے دینا کسی صورت قابل قبول نہیں۔
انہوں نے تمام سیکریٹریز کو ہدایت کی کہ وہ اللہ کو حاضر و ناظر جان کر اس امر کا عہد کریں کہ بلوچستان کے نوجوانوں کی نوکریاں فروخت نہیں ہونے دیں گے۔ وزیراعلیٰ نے ماتحت اہلکاروں اور ریکروٹمنٹ کمیٹیوں کی کڑی نگرانی یقینی بنانے پر بھی زور دیا۔
ان کا کہنا تھا کہ بھرتیوں کے عمل میں کسی بھی سطح پر بے ضابطگی برداشت نہیں کی جائے گی اور نوکریوں کی خرید و فروخت کے معاملے میں کسی غلطی یا کوتاہی پر معافی کی گنجائش نہیں ہوگی۔
وزیراعلیٰ بلوچستان نے کہا کہ سرکاری ملازمتوں میں شفافیت یقینی بنانے کے لیے حکومت ہر طرح کا دباؤ برداشت کرے گی، تاہم بلوچستان کے نوجوانوں کے حق پر کوئی سمجھوتہ نہیں کیا جائے گا۔
میر سرفراز بگٹی نے افسران پر اعتماد کا اظہار کرتے ہوئے کہا کہ وہ باصلاحیت ہیں اور صوبے کو درست سمت میں لے جانے کی صلاحیت رکھتے ہیں۔ انہوں نے کہا کہ میرٹ پر مبنی نظام قائم کرکے ہی نوجوانوں کا ریاست اور حکومتی اداروں پر اعتماد بحال کیا جاسکتا ہے۔
Keyword: Balochistan Jobs Merit Policy
Slug: balochistan-jobs-merit-policy-sarfaraz-bugti
Meta Description: وزیراعلیٰ بلوچستان سرفراز بگٹی نے سرکاری نوکریوں کی خرید و فروخت روکنے کا عزم کرتے ہوئے کہا ہے کہ بے ضابطگی ثابت ہونے پر متعلقہ وزیر اور سیکریٹری کے خلاف کارروائی ہوگی۔
Tags:
بلوچستان، سرفراز بگٹی، بلوچستان میں نوکریاں، سرکاری نوکریاں، نوکریوں کی خرید و فروخت، میرٹ، میرٹوکریسی، بلوچستان حکومت، بھرتیوں میں شفافیت، محکمہ جنگلات، بے ضابطگیاں، سرکاری بھرتیاں، چیف سیکریٹری بلوچستان، نوجوانوں کے روزگار، کوئٹہ
