اسلام آباد: وزیر مملکت خزانہ اور ریلوے بلال اظہر کیانی نے کہا ہے کہ پاکستان میں ڈیجیٹل لین دین میں نمایاں اضافہ ریکارڈ کیا گیا ہے۔
بلال اظہر کیانی کی بل گیٹس فاؤنڈیشن کے اعلیٰ سطح کے وفد سے ملاقات ہوئی۔
ملاقات میں گلوبل پالیسی اینڈ ایڈووکیسی ڈویژن کی قائم مقام صدر ڈاکٹر کلپنا کوچہر اور دیگر اعلیٰ عہدیدار شامل تھے۔
اس دوران پاکستان میں ڈیجیٹل تبدیلی، معاشی اصلاحات کے ایجنڈے اور کیش لیس اکانومی پر پیش رفت جیسے امور پر تبادلہ خیال کیا گیا۔
اس موقع پر بلال اظہر کیانی نے کہا کہ وزیراعظم شہباز شریف کی کیش لیس اکانومی کے ایجنڈے کے تحت پاکستان میں ڈیجیٹل لین دین میں نمایاں اضافہ ہوا ہے۔
ڈیجیٹل لین دین کرنے والوں کی تعداد 5 لاکھ سے بڑھ کر 20 لاکھ سے زائد ہوگئی ہے۔
جون 2026 تک کے لیے طے کردہ ہدف حاصل کرلیا ہے اور اس تعداد میں مزید اضافہ کے ہدف کو بھی حکومت پورا کرے گی۔
وفد نے حکومتی اصلاحاتی اقدامات کو سراہتے ہوئے گیٹس فاؤنڈیشن کی جانب سے کیش لیس پاکستان اور وسیع تر معاشی اصلاحاتی ایجنڈے کی حمایت جاری رکھنے کا یقین دلایا۔
