مکران: مکران ڈویژن کے ضلع تمپ میں سیکیورٹی فورسز نے بروقت کارروائی کرتے ہوئے ڈپٹی کمشنر تمپ کے پروٹیکشن اسکواڈ کو نشانہ بنانے کی دہشت گردوں کی کوشش ناکام بنا دی۔
سیکیورٹی ذرائع کے مطابق دہشت گردوں نے ڈپٹی کمشنر کی گاڑی کو نشانہ بنا کر پروٹیکشن اسکواڈ کے اہلکاروں کو اغوا کرنے کی کوشش کی، تاہم سیکیورٹی فورسز نے فوری کارروائی کرتے ہوئے دہشت گردوں کے عزائم ناکام بنا دیے۔
ذرائع کا کہنا ہے کہ کارروائی کے دوران ڈپٹی کمشنر تمپ کے پروٹیکشن اسکواڈ میں شامل تمام اہلکاروں کو بحفاظت محفوظ مقام پر منتقل کردیا گیا۔
سیکیورٹی فورسز کی جوابی کارروائی کے بعد حملہ آور دہشت گرد اپنی گاڑی اور اسلحہ چھوڑ کر فرار ہوگئے۔ ذرائع کے مطابق کارروائی کے دوران متعدد دہشت گردوں کے زخمی ہونے کی بھی اطلاعات ہیں۔
سیکیورٹی ذرائع کے مطابق واقعے کے بعد علاقے میں صورتحال مکمل طور پر قابو میں ہے جبکہ سیکیورٹی فورسز کی جانب سے مزید کارروائیاں جاری ہیں۔
