اسلام آباد: وفاقی آئینی عدالت نے خیبرپختونخوا کے وزیراعلیٰ سہیل آفریدی کے انتخاب کے خلاف دائر درخواست 14 ستمبر کو سماعت کے لیے مقرر کردی۔
درخواست سابق رکن قومی اسمبلی اور پی ٹی آئی رہنما شیر افضل مروت کی جانب سے دائر کی گئی ہے، جس میں سہیل آفریدی کو وزیراعلیٰ کے عہدے کے لیے نااہل قرار دینے کی استدعا کی گئی ہے۔
درخواست میں سابق وزیراعلیٰ علی امین گنڈاپور کو دوبارہ وزیراعلیٰ خیبرپختونخوا کے منصب پر بحال کرنے کی بھی استدعا کی گئی ہے۔
شیر افضل مروت نے درخواست میں مؤقف اختیار کیا ہے کہ سہیل آفریدی کی بطور وزیراعلیٰ نامزدگی پی ٹی آئی کے بانی عمران خان نے کی تھی، جو درخواست گزار کے مطابق اس وقت سزا یافتہ ہیں۔
وفاقی آئینی عدالت نے درخواست سماعت کے لیے مقرر کرتے ہوئے فریقین کو نوٹسز جاری کرنے سمیت دیگر قانونی تقاضے پورے کرنے کا عمل شروع کردیا ہے۔
14 ستمبر کو ہونے والی سماعت کے دوران درخواست کی قابلِ سماعت ہونے کی حیثیت اور وزیراعلیٰ سہیل آفریدی کے انتخاب سے متعلق قانونی نکات پر دلائل دیے جانے کا امکان ہے۔
