بحیرہ عرب میں پاکستان اور ایران کے علاقے گوٹر بے میں 35 فٹ لمبی بلیو وہیل مردہ پائی گئی ۔
ڈبلیو ڈبلیو ایف کے مطابق مقامی ماہی گیر احمد بلوچ نے بلوچستان میں کنتانی کے قریب بلیو وہیل کو مردہ دیکھا جس کی ہلاکت پر تشویش کا اظہار کیا جارہا ہے ۔
ڈبلیو ڈبلیو ایف حکام کے مطابق امکان ہے وہیل چند روز قبل پاکستان اور ایران کے درمیان کھلے سمندر میں مرگئی ہو، تیز لہروں اور سمندری بہاؤ کے باعث وہ گوٹربے کی طرف چلی گئی ہو ۔
انہوں نے کہا کہ وہیل کی موت کی صحیح وجہ کا پتا نہیں چل سکا، ہو سکتا ہے کہ وہیل جال میں پھنس گئی ہو جو عام طور پر اس علاقے میں ماہی گیری کے لیے استعمال ہوتا ہے ۔
بلیو وہیل پاکستان کے سمندرمیں پائی جانے والی 3 بڑی بیلین وہیلز میں سے ہے، آخری بلیو وہیل 8 اپریل 2024 کو بلوچستان کے علاقے گڈانی میں دیکھی گئی، بلیو وہیل کی زیادہ سے زیادہ لمبائی تقریباً 100 فٹ اور وزن 200 ٹن تک ہو سکتا ہے ۔
