سہ ملکی سیریز کے تیسرے میچ میں افغانستان نے متحدہ عرب امارات کو 38 رنز سے شکست دیدی، افغانستان کے 189 رنز کے ہدف کے جواب میں یو اے ای کی ٹیم نے آٹھ وکٹوں کے نقصان پر 150 رنز بنائے اور میچ ہار گئے ۔
شارجہ کرکٹ گراؤنڈ میں کھیلے گئے سہ ملکی سیریز کے تیسرے میچ میں متحدہ عرب امارات نے ٹاس جیت کر افغانستان کو پہلے بیٹنگ کی دعوت دی ۔
افغانستان نے مقررہ اوورز میں چار وکٹوں کے نقصان پر 188 رنز بنائے جس میں ابراہیم زدران 63 اور صدیق اللہ اتل 54 رنز بنا کر آؤٹ ہوئے ۔
رحمان اللہ گرباز نے 7، درویش رسولی نے 10، عظمت اللہ عمرزئی نے 20 اور کریم جنت نے 23 رنز بنائے، متحدہ عرب امارات کی جانب سے محمد روہید اور ساغر خان نے دو ،دو وکٹیں حاصل کیں ۔
مقررہ ہدف کے تعاقب میں میزبان ٹیم نے آٹھ وکٹوں کے نقصان پر 150 رنز بنائے ،متحدہ عرب امارات کی جانب سے محمد وسیم نے شاندار 67 اور راہول چوپڑا نے 52 رنز بنائے ۔
افغانستان کی جانب سے راشد خان اور شرف الدین اشرف نے 3،3 جبکہ فضل حق فاروقی اور محمد نبی نے ایک، ایک وکٹ حاصل کی، شرف الدین اشرف کو شاندار باؤلنگ پر میچ کا بہترین کھلاڑی قرار دیا گیا ۔
