وزیراعلیٰ خیبرپختونخوا علی امین گنڈا پور نے کہا ہے کہ 22 اگست کو اسلام آباد میں ہر صورت میں جلسہ کریں گے۔ انہوں نے یہ بات پشاور میں جلسے کی تیاریوں کا جائزہ لینے کے لیے ایک اجلاس میں کہی۔ اجلاس میں علی امین گنڈا پور نے ہر رکن اسمبلی کو زیادہ سے زیادہ ورکرز لانے کی ہدایت کی۔
ذرائع کے مطابق اجلاس میں قائدین کی کثیر تعداد نے شرکت کی، وزیر اعلیٰ نے ہر علاقے کے نمائندوں کے ساتھ الگ الگ ملاقات بھی کی۔ اجلاس سے اپنے خطاب میں وزیراعلیٰ علی امین گنڈا پور نے کہا کہ قانونی تقاضوں کے مطابق جلسہ کرنے جارہے ہیں، ہماری تمام تیاریاں مکمل ہیں،اگر کوئی کورٹ کے حکم کے خلاف جائے گا تو پھر ہم بھی پیچھے ہٹنے والے نہیں۔
علی امین گنڈاپور نے کہا کہ جلسہ کے لئے مارچ کی قیادت خود کروں گا، مزید کہا کہ مرکز میں بیٹھے نااہل ٹولے کی مفاد پرست پالیسیوں کی وجہ سے ملک میں معاشی تباہی آچکی، ملکی حالات خراب سے خراب تر ہورہے ہیں، ہمیں بحیثیت قوم سوچنا ہوگا۔ انہوں نے کہا کہ ہم اپنے ساتھ مشینری لیکر جائیں گے، کرین، ٹریکٹر، آنسو گیس سے بچنے کے لئے ماسک بھی ساتھ لے کر جائیں گے، اپنے ساتھ تیار سٹیج، اور دیگر چیزیں بھی لے کر جائیں گے۔ انہوں نے ورکرز کے لئے ہر نمائندے کو گاڑیوں کا بندوست کرنے کی بھی ہدایت کی۔ علی امین گنڈا پورنے تمام ورکرز کو صوابی کے مقام میں جمع ہونے کی ہدایت کی۔
