تائیوان میں زمین زلزلے سے لرز اٹھی

تائیوان میں زمین زلزلے سے لرز اٹھی۔چند ہی سیکنڈز میںمتعدد عمارتیں ملبے کا ڈھیر بن گئی۔ہلاکتوں کا خدشہ ظاہر کیا جارہاہے

تائیوان میں 7اعشاریہ 2شدت زلزلے کے بعد کئی عمارتیں ملبے کا ڈھیر بن گئیں جبکہ شدید زلزلے کے بعد جاپان اور تائیوان میں سونامی الرٹ جاری کردیا گیا ہے۔تائیوانی حکام کا کہنا ہے کہ زلزلے سے بعض عمارتیں گر گئی ہیں اور جانی نقصان کا خدشہ ہے۔ زلزلے سے 4افراد ہلاک اور 60سے زائد زخمی ہوئے ہیں تاہم مزید ہلاکتوں کا خدشہ ظاہر کیا جا رہا ہے۔زلزے کے بعد تائیوان کے دارالحکومت تائی پے کے متعدد علاقوں میں بجلی کی فراہمی معطل ہو گئی۔7اعشاریہ 2شدت کا زلزلہ تائیوان کے مشرقی ساحل کے قریب آیا جس کے بعد کئی آفٹر شاکس آئے جن کی شدت 5ریکارڈ کی گئی۔

زلزلے کے نتیجے میں سمندر میں تین میٹر بلند لہریں پیدا ہوئیں۔ اسی سبب سے تائیوان اور جاپان کے سیاحتی علاقے اوکی ناوا میں سونامی کی وارننگ جاری کردی گئی ہے اور رہائشی علاقوں سے لوگوں کو انخلا کے احکامات جاری کردیے گئے ہیں۔تائیوان سے 110کلو میٹر فاصلے پر واقع یونا گونی علاقے میں سونامی پہنچ چکا ہے جہاں 30سینٹی میٹر تک بلند لہریں ریکارڈ کی جا رہی ہیں۔خدشہ ظاہر کیا گیا ہے کہ آئندہ چند گھنٹوں میں یہ لہریں مزید بلند ہوں گی۔زلزلہ پیما مرکز کے مطابق تائیوان کے مشرقی ساحلی علاقے میں آنے والے زلزلے کی گہرائی 15.5کلومیٹر ریکارڈ کی گئی ہے۔زلزلے کے بعد چین نے تائیوان کو امداد کی پیشکش کردی ہے۔یاد رہے کہ تائیوان میں 1999 میں آئے 7.6شدت کے زلزلے میں 2400افراد ہلاک ہوئے تھے۔