پشاور (حسن علی شاہ سے): سابق وفاقی وزیرِ پٹرولیم انور سیف اللہ خان نے اخبارِ خیبر سے خصوصی ملاقات کے دوران کہا ہے کہ عدالت نے انصاف کے تقاضے پورے کرتے ہوئے ان کی اپیل منظور کی اور انہیں باعزت بری کر دیا۔ ان کا کہنا تھا کہ قانون کی بالادستی اور انصاف پر یقین ان کے خاندان کی ایک دیرینہ روایت رہی ہے۔
انور سیف اللہ خان نے کہا کہ ان کے حلقے کے عوام نے ہمیشہ ان پر اعتماد کیا، جس کی بنیادی وجہ یہ ہے کہ تاریخ گواہ ہے انہوں نے عوامی مفاد کو مدِنظر رکھتے ہوئے ریکارڈ ترقیاتی منصوبے پایۂ تکمیل تک پہنچائے۔ ان کا کہنا تھا کہ گزشتہ دس برسوں کے دوران ضلع لکی مروت کو بری طرح نظرانداز کیا گیا، جس کے باعث عوام کو بنیادی سہولتوں کی شدید کمی کا سامنا ہے۔
سابق وفاقی وزیر نے کہا کہ اگر انہیں دوبارہ عوام کی خدمت کا موقع ملا تو وہ اپنے حلقے کے عوام کے بنیادی مسائل کو ترجیحی بنیادوں پر حل کرنے کی بھرپور کوشش کریں گے۔ انہوں نے واضح کیا کہ میرٹ کی بنیاد پر روزگار کی فراہمی، امن و امان کا قیام اور عوام کے جان و مال کا تحفظ ایک منتخب عوامی نمائندے کا بنیادی فرض ہوتا ہے۔
انور سیف اللہ خان نے اس عزم کا اظہار کیا کہ وہ ان شاء اللہ اپنے آبا و اجداد کی شاندار سیاسی اور عوامی خدمت کی روایات کو برقرار رکھتے ہوئے علاقے کی ترقی اور خوشحالی کے لیے کردار ادا کرتے رہیں گے۔
