خیبر پختونخوا حکومت نے صوبے کے معمر شہریوں کو ایک بڑی سہولت دینے کا فیصلہ کیا ہے، وزیر اعلیٰ خیبر پختونخوا محمد سہیل آفریدی کی زیر صدارت ہونے والے ایک اعلیٰ سطح کے اجلاس میں بزرگ شہریوں کے لیے پشاور کی بی آر ٹی بسوں میں بالکل مفت سفر کی منظوری دے دی گئی ۔
پشاور: منصوبے کے تحت 60 سال یا اس سے زائد عمر کے تمام شہریوں کو ‘احساس بزرگ کارڈ’ جاری کیے جائیں گے، جس کے بعد وہ بی آر ٹی بسوں میں بغیر کسی کرائے کے سفر کر سکیں گے ۔
حکومت کے مطابق بزرگ شہریوں کو مفت سفری سہولت فراہم کرنے پر سالانہ 935 ملین روپے کا خرچ آئے گا، جسے صوبائی حکومت خود برداشت کرے گی ۔
کارڈز کے شفاف اجراء کو یقینی بنانے کے لیے تمام معمر افراد کی معلومات کی نادرا سے تصدیق کی جائے گی، تصدیقی عمل مکمل ہوتے ہی اگلے 5 ماہ کے اندر اندر شہریوں کو احساس بزرگ کارڈز فراہم کر دیے جائیں گے ۔
حکام نے واضح کیا ہے کہ کارڈز کے غلط استعمال کو روکنے کے لیے سخت اقدامات کیے جا رہے ہیں، اگر کسی دوسرے شخص نے کسی بزرگ شہری کے کارڈ کا غلط استعمال کیا تو اس پر 500 روپے جرمانہ عائد کیا جائے گا ۔
صوبائی حکومت کا کہنا ہے کہ اس اقدام کا بنیادی مقصد اپنے معمر شہریوں کو مالی مدد فراہم کرنا اور ان کے سفر کو آسان اور باوقار بنانا ہے ۔
