وینزویلا کے گرفتار صدر نکولس مادورو کو خصوصٰ طیارے میں امریکی شہر نیویارک منتقل کر دیا گیا ہے، مادورو نیویارک کے اسٹیورٹ انٹرنیشنل ایئرپورٹ پر امریکی سرزمین پر پہنچے، جہاں سیکیورٹی کے انتہائی سخت انتظامات کیے گئے تھے ۔
امریکی میڈیا کے مطابق طیارے کی آمد کے وقت ٹارمک پر فیڈرل بیورو آف انویسٹی گیشن اور ڈرگ انفورسمنٹ ایڈمنسٹریشن کی جیکٹس پہنے اہلکار موجود تھے، جس سے آپریشن کی حساسیت کا اندازہ لگایا جا سکتا ہے ۔
امریکی اٹارنی جنرل پامیلا بوندی نے بتایا کہ نکولس مادورو اور ان کی اہلیہ سیلیا فلورس کے خلاف نیویارک کے جنوبی ضلع میں وفاقی الزامات کے تحت فردِ جرم عائد کر دی گئی ہے ۔
پامیلا بوندی کے مطابق مادورو پر منشیات کی دہشت گردی کی سازش، کوکین امریکا درآمد کرنے کی منصوبہ بندی، مشین گنوں اور تباہ کن آلات رکھنے، اور امریکا کے خلاف اسلحہ استعمال کرنے کی سازش جیسے انتہائی سنگین الزامات عائد کیے گئے ہیں ۔
اٹارنی جنرل پامیلا بوندی نے سوشل میڈیا پلیٹ فارم ایکس پر بیان میں کہا کہ نکولس مادورو کو امریکی سرزمین پر امریکی عدالتوں میں مکمل امریکی انصاف کا سامنا کرنا پڑے گا ۔
اطلاعات ہیں کہ آئندہ ہفتے مین ہیٹن کی وفاقی عدالت میں صدر مادورو پر منشیات اور اسلحہ سے متعلق الزامات کے تحت باضابطہ فردِ جرم عائد کیے جانے کا امکان ہے ۔
دوسری جانب وینزویلا کی اپوزیشن رہنما ماریا کورینا ماچادو نے مادورو کی گرفتاری کے بعد اپوزیشن امیدوار کے فوری طور پر اقتدار سنبھالنے کا مطالبہ کر دیا ہے ۔
